el filósofo La Boetie , sefardí francés

http://forojudio.com/bin/forojudio.cgi?ID=7497&q=7

La ultima konfesion de Etienne de la Boétie
Por: Gad Nassi
Fuente: Aki-Yerushalayim.co.il
Mar Abr 10 2012 (18 Nisan, 5772)
“Perdona te rogo, los pekados de este puevlo… asigun lo perdonates del diya ke se salvo del esklavaje en Ayifto i fin’a muestros diyas….” Kol Nidre
Achakes de la insekuridad provokada por la Inkizision en Espanya i en Portugal, munchos de asendensia djudia eskojeron el exilo en formando muevas komunidades en diferentes payizes. Una parte de estos exilados arivaron al Sud de la Fransia basho la kuvierta de Kristianos Muevos, i se aresentaron en diferentes sivdades. Kon la meskla de estos kon la povlasion lokala, se formaron grupos sosiales, ke kon sus inklinasiones kulturales i sus influensa en la edukasion, la administrasion i la vida ekonomika, orientaron i influensaron el pensamiento en la politika, la filozofia i la literatura.

En este mizmo konteksto, aviamos tratado de los atadijos de Montaigne kon sus raizes sefardis i de la influensa posible de estos atadijos sovre su kariera.[1] En efekto, aparte de su asendensia sefaradi de la parte de su madre, Montaigne se agrendesio, fue edukado i bivio en una ambiansa ande kripto-djudios okupavan postos importantes.

El sujeto de este artikolo es djustamente uno de estos kripto-djudios, Étienne de La Boétie. Los atadijos de Montaigne kon La Boétie tuvieron una influensa importante en su kariera. La muerte prematurada de La Boétie a la edad de 33 anyos, konstituyo un evenimiento kardinal i posiblamente desizivo, ke pusho a Montaigne a renunsiar al posto de konsejero en el Parlamento Djudisiaro de Bordeaux i a retirarse a su kastilio para elaborar i redaktar su ovra. De otra parte, Étienne de La Boétie ya se avia echo remarkar de antes, kon su ovra literaria i filozofika ke le avia prometido un avenir briyante.

La biografia

Nasido en 1530 en Sarlat, en la rejion de Périgord, en el Sud-oeste de Fransia, La Boétie era de tres anyos mas aedado de Montaigne. Se pensa ke su familya paternala ke avia apartenido a la burgezia, avia aksedado a la aristokrasia desde el siglo XV. Su padre fue un fonksionario real en Perigord i su madre era la ermana del prezidente del Parlamento Djudisiario de Bordeaux. Entre 1540 i 1548, se piedren sus trasas. No se save ande segio sus estudios de kolejio. Es notado ke mizmo si avia segido sus estudios sekondarios en Sarlat, ande nasio, puede ser ke avia estudiado durante un sierto periodo en un kolejio en Paris, lo ke puede aklarar su inklinasion por la literatura i la poezia, i sus atadijos kon el famozo grupo de poetas, La Pléiade. A la edad de 23 anyos, termino sus estudios de derecho en la Universitad de Orléans. Es durante el periodo de sus estudios universitarios ke La Boétie kompozo su prinsipala i briyante ovra, Discours de la Servitude Volontaire (Diskorso de la Servitud Volontaria).

Esta ovra avia sirkulado en forma de manuskrito de mano en mano en alkansando una fama konsiderable en los sirkolos intelektuales de Périgord. En efekto, Montaigne ya la avia meldado antes de aver konosido personalmente a la Boétie.

La Universitad de Orléans fue un sentro ande todo modo de ideas eran diskutidas de una manera libre. Anne du Bourg, ke fue el prinsipal mestro de La Boétie, iva ser kemado en la ogera, en 1559, por erezia. Ainda kuando estava ensenyando, du Bourg era notado por sus ideas de reforma relijioza i su tendensia al Protestantizmo. De mizmo, siertos de los amigos de klasa de La Boétie ivan a ser giyadores ferventes de los Huguenotes, i la Universitad de Orléans iva ser un sentro del Kalvinizmo.

Su talento prekosio i su asendensia noble, djuntos kon los postos okupados por los miembros de su famiya, favorizaron probablamente ke La Boétie sea nominado kon un orden real al Parlamento de Bordeaux en 1553, aunke su edad ainda no lo permetia. Fina su disparision en 1563, La Boétie tuvo, una karyera briyante en tanto ke djuzgo i negosiador politiko. Fue kargado de intervenir para lograr la paz entre katolikos i protestantes durante las Gerras de Relijion.

Aparte de ser un poeta, La Boétie fue un distingido umanisto. Treslado ovras de Erasmus, Xenophon, Virjil i Plutark.

Es en este konteksto ke Étienne de La Boétie i Michel de Montaigne se enkontraron en seyando una amistad, ke sus konsekuensas desidieron el impakto de estas dos figuras en el patrimonyo espiritual i politiko de la sivilizasion.

En efekto, Montaigne inkluira las ovras de La Boétie en sus livros de ensayos, i inspirandose de sus atadijos kon el, konsakrara uno de sus ensayos a l’amistad.

Su Ovra

El Diskorso de la Servitud Volontaria, kon su analiza de la tirania i de la interaksion entre el tirano i el puevlo, konstituye la ovra majistrala de La Boétie. Es kon la aktualidad i la relevensia de sus konviksiones ke La Boétie fue el fondador de la filozofia politika en Fransia, i aksedo a su fama komo uno de los arkitektos de la filozofia politika universala.

Inspirada probablamente por la revolta del puevlo kontra la taksa de la gabelle[2] i la lucha por la libertad relijioza de los protestantes, esta ovra ekspoza exemplos de la antikidad klasika sovre la tirania, i elabora los diritos del puevlo por la libertad ansi ke las maneras de detronar a sus opresores.

Asigun La Boétie, kada tirania es bazada sovre su akseptansa por el puevlo. En efekto, la grande masa del puevlo, por kualkera razon ke sea aksepta su propria sumision. Sin esto, dingun governo ni tirania no pueden turar. El tirano no es mas ke una sola persona, i no tiene el solo, el poder de desidar de la sumision de una otra persona, i ainda menos, de un payis entero.

De esta konsepsion deriva la kestion sentrala de su teoria politika: “Deke en este mundo el puevlo konsiente a su proprio esklavaje?” Para La Boétie, el konsentimiento de un puevlo a someterse al despotismo de una minoria es estranyo, orible i kuaji un misterio.

De otra parte, konsiderando ke kada tirania depende del konsentimiento del puevlo, La Boétie konkluye ke “es klaro ke no es de menester de kombatir para renversar el tirano, porke el es otomatikamente derrotado si el puevlo refuza de someterse al esklavaje. En efeto el tirano no tiene nada mas ke el poder akordado por el puevlo.”

Asigun La Boétie, existen tres djeneros de tiranos: algunos resiven sus poder en siendo elijidos por el puevlo, otros por la fuersa i las armas i otros por erensia. Los uzurpadores ovran siempre komo si podestan un paiz konkistado i los ke nasen de una asendensia reala no son muy diferentes, porke son alimentados del pecho de la tirania, chupan kon la leche los instinktos del tirano, i konsideran al puevlo komo sus servidores eredados. En kuanto a los elijidos, eyos devrian ser mas suportables, ma siempre miran de konvertir sus eleksion en un despotismo ereditario, i ansi depasan a los otros tiranos en krueldad, porke no topan otra posibilidad para impozar sus tirania, mas ke de renforsar el kontrol i empidir de sus sujetos toda nosion i memoria de libertad… Kualker ke sea el kamino ke yeva al poder, el metodo de los governadores es praktikamente siempre el mizmo.

La existensia de personas ke nunka konosieron la libertad i ke son akostumbradas a la sumision, es la primera razon de sus esklavaje. La Boétie eskrive: “Los ke nasieron basho el yugo i fueron elevados basho la sumision, se kontentan de bivir asigun nasieron…” La segunda razon es ke la djente devienen “espantozos i efeminados…” La tresera razon es sin duvdo la mas importante, porke mos revela la fuente i el sekreto de la dominasionke son: el poder i su uzo por el akumplamiento de tirania”. El tirano es apoyado por unos kuantos fideles ke someten el payis entero. Estos se aserkan del tirano para pueder manipularlo, ma tienen otras personas ke los ovedesen, i estos tienen otras personas ke avansan kon titolos de dinyitad, les dan provinsias o el dirito de maniar los dineros. Esto les es akordado para ke pueden aktuar kon sus aviditad o sus krueldad, siendo protejados del kastigo por sus krimenes abrigandosen basho la solombra de sus protektores….

La agonia i la konfesion

En 1563, La Boétie es akablado por una malatia ke empesa kon una dizenteria ke se agrava. Rendiendose kuento de la seriozidad de su estado, dikta su testamento. Montaigne esta a su lado. En una letra adresada a su padre, Montaigne deskrive los ultimos diyas de su amigo.

Un pasaje de esta letra raporta las palavras de La Boétie al saserdote despues ke avia terminado su ultima bendision:

“… Konstatando ke el saserdote se estava preparando a irse, lo yamo i le disho:
‘… De mas, kero dizir en su prezensia: esto deklarando ke, en la manera ke fui baptizado, i bivi, ansi kero murir: en la fey i la relijion ke Moshe prediko en Ayifto, i ke, mas tadre los patriarkas la akseptaran i profesaron en Yeuda, i ke en el korso del tiempo fue transmetida a la Fransia i a mozotros.'[3]
Paresia ke keria adjustar mas, ma, se kedo en demandando de mi i de su tio de arogar por el….”

* * *

En akeyos tiempos, grasias a sus rikezas, famiyas de muevos kristianos en el Sud de la Fransia, avian aksedado a ser integradas en la nobleza.[4] En esta perspektiva es posible ke los de La Boétie fueron la kontinuasion de una de estas famiyas.

Es i posible ke una afinitad espirituala kon una empatia resiproka derivada de una similaridad de asendensia, fueron en mizmo tiempo la baza de l’amistad entre La Boétie i Montaigne, asigun lo provan los atadijos de La Boétie kon los miembros de la famiya de Montaigne.[5]

De mizmo, el fakto ke Montaigne eskojo a su padre para deskrivir en su letra los ultimos diyas de La Boétie, apoya esta posibilidad.

Las palavras de su konfesion azen pensar ke La Boétie tuvo un sierto remorso por su ultimo akto relijiozo komo katoliko, i ke en segito, sintio el menester de revelar su verdadera identidad. Estas palavras evokan de mizmo un pasaje del Kol Nidre, orasion en la kuala, asigun la tradision, los desendientes de los konversos ke retornan al Djudaizmo, esperan la klemensia del Dio, por el pekado de aversen konvertido al Kristianizmo.

La ovra de La Boétie, kon sus ideas liberales i reformistas i su lucha por un orden politiko ekitable, respektando los diritos umanos, tiene munchos aspektos ke karakterizan las aspirasiones de los kripto-djudios en Evropa, en akeyos tiempos. Djuntos kon esto, es prinsipalmente a la baza de su ultima konfesion ke le fue atribuida una asendensia djudia.[6]

[1] Gad Nassi, Montaigne i sus Raizes Sefaradis, un Atadijo non Reklamado, Aki Yerushalayim, XXIV,73, Noviembre 2003, 8-12.

[2] Taksa sovre la preparasion i la vendidad de un produkto. Impozada en Fransia sovre la sal. La aristokrasia, el kuerpo relijiozo i otros privilejiados fueron exemptos de esta taksa.

[3] “Encores veux je dire cecy en vostre presence: Je proteste, que comme j’ay esté baptizé, a vescu, ainsi veux-je mourir soubs la foy et religion que Moyse planta premierement en Ægypte: que les Peres receurent depuis en Judee, et qui de main en main par succession de temps a esté apportée en France.”

[4] En una satira entitulada Critique du nobiliaire de Provence, publikada en el empesijo del siglo XVIII, fueron desveladas famiyas aristokratas de asendensia djudia. Ver: Gad Nassi, La Falsa Korespondensia entre los Djudios de Arles i los de Estambol, Aki Yerushalayim, 27, 8, Oktobre 2006.

[5] En el empesijo de su malatia, La Boétie avia eskojido la parokia aparteniendo a Richard de Lestonnac, kazado kon Jeanne, ermana de Montaigne, para repozarse en interompiendo su viaje. Es ayi ke iva murir. La Boétie se avia kazado kon Marguerite de Carle, una bivda kon dos ijas. Jacquette d’Arsac, una de estas ijas se iva kazar kon Thomas de Montaigne, ermano de Montaigne. Jacquette i Thomas fueron prezentes al lado de La Boétie, durante sus dias de agonia.

[6] Richard P. Popkin, artikolo Étienne de La Boétie, Encyclopaedia Judaica; Harry Friedenwald, Montaigne’s Relation to Judaism and the Jews, The Jewish Quarterly Review, New Series, 31, 2, Oct., 1941, 141-148.
Para mas detalios sovre la biografia de La Boétie: Anne-Marie Cocula, Étienne de La Boétie, Sud Ouest, 1995.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s